السلام عليكم "
البوست هذا ناوية أعمله من شهر تقريبا لكن كالعادة عجزااانة ^_^
المهم هذا روتيني اعمله تقريبا كل اسبوعين وأحيانا اشطح 3 اسابيع <<<< عجزااانة هههههه ادري ادري
هوا شي بسيط لكن مايغني عن روحة الصالون كلة فترة وفتره لعناية أفضل
طبعا أحيانا أستخدم أقنعة ومقشرات جاهزة من الصيدلية أو من نزيه
لكن حبيت في هذا البوست أني أخلي كل شي طبيعي ومتوفر بالبيت <<< عشان يكون أسهل للي مستعجلة ومايمديها تنزل تشتري الماسكات والمقشرات
أول شي نبدأ بالتونيك اللي حيساعد على فتح المسام وتنظيف الوجه
ممكن تستخدمي تونيك اسكينول أو غارنييه أو كلين أند كلير >>> كل وحدة واللي اتعودت عليه
أنا بستخدم تونيك فارمسي بالخيار بـ 10 ريال من صيدلية النهدي
وبعد كذا رح نستخدم البخار
اللي عندها الجهاز تبع بخار الوجه خير وبركة
واللي ماعندها تغلي موية وتحطها بصحن وتحطي راسك قريب منها وغطي راسك بمنشفة عشان البخار مايطلع
أنا عن نفسي أستخدمت جهاز بخار الساونا اللي عندي
بعد ما تعرضي وجهك للبخار لمدة لا تقل عن 10 دقائق ولا تزيد عن 15 دقيقة
جيبي هذي المقادير عشان نعمل المقشر الطبيعي
ملعقة عسل طبيعي ( اللي عندي مخلوط بحبة البركة ) + نص ليمونة ( واذا بشرتك حساسة بعدي عنه ) + ملعقة شاي كركم الجسم + ملعقة كبيرة بيكربونات الصوديوم + ملعقتين كبيرة سكر + ملعقة ماء ورد
تخلط المكونات مع بعض وتنحط عالوجه وترجعي لمدة 3 دقايق عالبخار ,, بعد كذا تبدأي تفكري المقشر على بشرتك بحركة دائرية لمدة 5 لـ 7 دقايق ,, بعدها تغسليه بمويه دافية دااااافية مو حاااارة
بعد كدا ممكن تستخدمي لصقات الأنف لإزالة الرؤوس السوداء
واذا ماعندك تقتدري تعمليها بالبيت ^_*
رح تحتاجي ملعقة حليب سائل + ملعقة جيلاتين بدون لون
واخلطيها شوية وحتلاقيها اتكتلت بعد كدا حطيها في الميكرويف لمدة 10 ثواني
وطلعيها وخليها دقيقة لحد ماتبرد وبعد كدا وزعيها بفرشة على أنفك وخليها لحد ما تنشف مرره
ونزليها وحتنزل معاها كل الرؤوس السوداء
وهذا المقطع ممكن يفيدكم ^_^
دحين جاء دور الماسك >>>> أخترت لكم قناع يساعد على تنعيم البشرة وإزالة البقع الداكنة منها
ملعقة عسل + ملعقة زبادي + نص ملعقة ماء ورد
طبعاً انا بعد ماسويته لاحظت انو خفيف مره عشان كذا اضفت له ملعقة كبيرة حليب بودرة
وتحطينة على وجهك لمدة 20 الى 30 دقيقة
وترجعي تشطفي وجهك بموية دااااافية مو حاااارة
بالنسبة للشفايف اكيييد مارح ننساها
ممكن تستخدمي مقشر الشفايف من ( LUSH )
وممكن تعملي مقشر شفايفك بنفسك ^_*
سكر + زيت زيتون
افركيها بنعومة لمدة 3 او 4 دقايق
بعد كدا غسلي بقايا الزيت بموية دافية وجيبي موية ورد مثلجة
أنا حاطة جواها شرايح خيار ^_^
مرريها على وجهك لمدة 4 دقايق عشان تتقفل المسام
وبعدها حطي من كريمك المرطب اليومي ورطبي شفايفك
وووووووووبس
أن شاء الله اكون افدتكم ولو بشيء بسيط
لو حبيتو البوست اشتركو بالمدونة عن طريق الضغط على الايقونة اللي يمين الصفحة ^_^
ولو عندكم أي استفسار حتلاقوني على
love
XOXO
XOXO
