السلام عليكم ""
كيفكم بنوتات ^_^
وعدتكم أوريكم غرفتي من شهر ودوبي قمت أتلحلحت وصورتها
سبب التأخير أنو تصويري مايحمس صراحة :( حاولت ازبطها بس ماش
ماتطلع حلوة بالصور
بس مو مشكلة بوريكم ياها وانتوا عاد جملوها بعيونكم خخخخخخخخخخخخخخخخخ
رح أبدأ بالركن اللي وريتكم اياه عالانستغرام ^_^ حق التكوة والتسدح ^_^
هذا الجزء اللي تشوفونه بعد ماتدخلون من مدخل الغرفة
السرير والشوفينيرة عندي من أول عشان كدا لونها أسود
ومارح اغيرها لأنها جديدة مالها الا كم شهر
هذي كنبة تتحول لسرير من ايكيا
أعتقد سعرها مع المرتبة بحدود 500 وشي
مررررررره مريحة واختي تنام عليها دايما خخخخخخخخ
والستارة بعد من ايكيا
المفروض احط وراها بطانة او ستارة أثقل
بس نسيت اشتري والى الان انتظر انزل السوق واكملها
من ورى الستارة ثبتت لمبات الكريسمس اللي الكل يسألوا عنها ^_^
اخذتها من مهجة اعتقد ب 30 ريال
صورة أقرب ^_^
مررررره جميلة بالليل لما اطفي لمبات الغرفة
هذا مفرش او بطانية من ايكيا
وطبعا ضروري شمعة باث أند بودي بالفانيلا
حوض الرزع دا المفروض فيه نبتة بس محد راضي يروح يشتريلي ورود حلوة
ماعجبوني اللي في ايكيا :"( ابغى ورود صدقية
المخدات الفرو من معرض أورا في الرد سي
والمخططة اللي بالنص أنا سويتها بالبيت ^_
****************
نجي للجزء تبع الشوفينيرة والأرفف ^_^
قايلتلكم تصويري من ذاك الزود بس معلييييييش
الادراج اللي عاليمين عندي من زمان زي ماقلت لكم
وفوقها صينية ايكيا المشهوووووورة وعليها كل عطوري
بعدها الأرفف من ايكيا أخدت اثنين جنب بعض عشان اغراضي كثير
واتمنيت لو أخذت ثالث كمان بس مافي مكان :")
وبعدها دولاب اكسسواراتي أخدته من الهدايا سنتر اللي في الصفا ب600 وشي
وبعدها طاولة صغننه عليها شنطي اليومية
هذي مجموعة عطوري
المفروض الحوض الوردي يكون فيه نبتة بس زي ماقلت لكم مالقيت النبتة المناسبة ليا باقي خخخخخخخخ
الارفف عليها اكسسوارات وشنظ وكم شوز من شوزاتي المفضلة
نبدأ من الجهة اليمين فوق
اول رف فيه باليتات ميك اب ولوشنات بودي شوب
الرف اللي تحته فيه مجموعة كريمات فيكتوريا سيكرت
علبة عطر المسك الاحمر من بودي شوب
برج خليفة مصغر ^_^
وفازة فيها ورد <<< في حال انكم ماشفتوها خخخخخخ
جهة اليسار
اول رف فيها عقودي المفضلة هالفترة
الستاندات اخدتها من البلد
ثاني رف فيه توحفة هيلز لوبوتان من ايكونيك
وبرواز جميل من ايكيا
وستاند اساور ^_^ ماحطيت فيه الا الاساور الكبير
الستاند من البلد
نجي للجزء اللي تحت
اليمين
الرفين الاولى فيها شنطي المفضلة واللي احبها ومميزة عندي
وتحت فيه صندوق اختي غدي فيه مناكير وخرابيط الاظافر ومجموعة كتبها حقت الكلية ..
اليسار
صندوق جميل ماادري من فين لأني سارقته من غدي
وعلب ايكيا المشهورة حاطة فيها خرابيط
شمعة
وستاند اليد هذا احبة بشكل ^_^ كمان من البلد
الرف اللي بعده فيه الشنط الكلتشز المفضلة عندي واللي ابي البسها اكثر فأحطها قدام عيني
وكم شوز مميزة عندي وزي منتو شايفين واحد منها مفقود بس بيرجع قريب خخخخخخخخ
( تحت رح احط لكم صور أقرب للأشياء الموجود عالأرفف )
وخلصنا جهة الأرفف ^_^
***********************
نجي لجهتي المفضلة
التسريحة ^_^
الجهةة اللي عاليمين زي ماقلت لكم دولات اكسسواراتي
وطاولة عليها شنطي اليومية
ومعلق فوقها شنطي الكروس بودي اليومية عشان يسهل عليا أبدل كل يوم بما أني ملولة
ويسار التسريحة فيه طاولة تي في طويلة عليها الشاشة والسماعات وكل شي يخص الميديا سنتر
الطاولة من ايكيا جهة المكاتب
اعتقد سعرها 370 أو حولها
والأرفف اللي في جهة اليسار أنا اضفتها
اعتقد سعرها 149 ريال
ستاند الكب كيك كمان من ايكيا ب 55 ريال
وحطيت فيه ارواجي اليومية
ورود
وأخر شي تحت حطيت ساعاتي واساوري اللي البسها كل يوم
المراية اربع قطع وركبتهم مع بعض صارت مربع كبير
تلاقونها في ايكيا اعتقد 49 او 39 ريال
والاضاءة ماغيرها لمبات ايكيا اللي عند كل العالم
والله مني فاكرة سعرها بس موجود بالموقع
فرش الميك اب رتبتها في هالاحواض
الكبيرة لفرش الوجة
والاسود الصغير لفرش العيون
صورة أقرب للستاند ^_^
كولاج بسيييييييط جدا
ماحبيت أسوي زحمة بس حطيت كم صورة احبها
هذي الارفف ياطويلين العمر عن قرب
فوق الارفف حاطة هاللوحة الكوستوم ميد ^_^ من جميلتي شيوووووم
احبتس يختي
وكتاب بينفت ^_^ شكله حلو مو ؟؟
في الرف الاول كيس فيكتوريا سيكرت للزينة >>> أبد مافيه قوائم مطاعم توصيل
فازة فيها خرابيط بسيطة
ونظاراتي الجميلة ^_^
ثاني رف فيه باليتاتي اللي احب شكلهم
وعلبة الكب كيك فيها مجموعة خواتم صغننة
عطر فيكتوريا سيكرت احب شكله
وشمعة
اخر رف فيه مجموعة ارواجي
مناكيري المفضلة
و3 باليتات استخدمهم دايما
*********************
دحين جاء دور مدخل الغرفة ^_^
عندي الغرفة بحمام الله يكرمكم
اول ماتدخل سيب صغيرون
باب الحمام الله يكرمكم عاليمين
وعاليسار جدار فاضي
قمت حطيت فيه 4 ارفف ورتبت شوزاتي المفضلة فيه
واخر رف حطيت فيه سلال لبقية شنطي وكلاتشاتي ^_^
طبعا الجهة اليسار او الجدار اليسار من الغرفة
ماحطيتة لأنه كله دولاب اسود
اتمنيت بابا يسمع كلامي ويسويلي غرفة كلوزت بس لملابسي بس ماش
قال مرررره شيلي الفكرة من راسي
مو ناوي يكسر جدران ويبني من جديد :"(
قلتلهم اصلا يوما ما بشتري مقطورة واسكن قدام باب البيت
واخلي هالغرفة كلوزت بس خخخخخخخخخخخخخخخخ
ووووووووووووبكذا اكون خلصت بوست الغرفة
اللي مابغى يخلص
لأي استفسارات وأسئلة تفزلوا ع تويتر وانستغرام
@zekraalsolami
وأحبكم وإن شاء الله عجبكم البوست
لو عجبكم خذوا اللينك وارسلوه لحبايبكم ^_*
Love
XOXO
