اسفنجة تنقية البشرة من إيكو تولز " ecotools Pure Complexion Facial Sponge

السلام عليكم "

كيفكم حبيباتي ؟؟

قبل فترة وريتكم في سناب أجدد مشترياتي وكانت من ضمنها أسفنجة تنقية البشرة من إيكو تولز ، وكثير منكم طلب ريفيو عنها ..

فقلت أجربها فترة وأقولكم رأيي فيها ..

أول شي أنا طلبتها من موقع درق ستور 

سعرها 6 دولارات

هالفترة أنشهرت بقوة مع هبة المنتجات الكورية 

المعروف عنها أنها صنعت يدويا من مكونات طبيعية 100% من أهمها ( الكونجك ) اللي هو نبات الجذر اللي يستخدموه الاسيوين كغذاء مزيل للسموم وأتعودوا يستخدموه من زمان اسفنجة التقشير الطبيعي للبشرة الحساسة .

هالاسفنجة مصممة عشان تنظف بعمق ولطف وتخلي البشرة منتعشة لأنها بتشيل الأوساخ والزيوت والمكياج. وكمان بتشيل خلايا الجلد القديمة وأي شوائب ممكن تتسبب في تضرر البشرة أو توسع مسامها ..

في منها إصدار ثاني للبشرة الحساسة جدا 

******************************

نجي لتجربتي ..

أول مافتحتها لاحظت أنها قاسية كأنها حجرة .. وفيها فتحات زي الفقاقيع 

حجمها أكبر تكة من البوتي بلندر .. ولما تبلليها تصير ناااااعمة وتنتفخ شويا ..

أنا أستخدم معاها غسولي العادي من بيوديرما مره وحدة باليوم .. لاحظت أنها تنظف البشرة عدل يعني مااحس الدهون ترجع تطلع بالتي زون بسهولة بعد ساعتين أو ثلاثة من الغسيل .. وبنفس الوقت تقشر تقشير ناعم جدا يعني عادي تستخدميها كل يوم .. يعني بالنسبة ليا صعبة أستخدم الكليراسونيك يوميا لأنو بشرتي حساسة وأي شي يهيجها .. لكن هذي ناعمة ولطيفة عالبشرة .. 

بعد ماأخلص منها أغسلها عدل ولا حظت أنها ما تنظف من الغسول بسهولة بعني يبغالك تشطفيها وتعصريها أكثر من مرة .. وبعد كذا تخليها في مكان جاف عشان تنشف وترجع لوضعها الأول ( حجري ) .. أنا ما أحب أخليها في الحمام ( أكرمكم الله ) أخاف تتراكم عليها الجراثيم وتأثر على وجهي .. عشان كذا أنصحكم تخلوها في مكان ثاني جاف ومفتوح .. 

************************

الشركة بتنصح أنو يتم تغييرها كل 1 - 3 شهور ..

أنا مارح أخليها لثلاث شهور .. إحتمال أغيرها بعد شهر 

وبالنهاية ماحتكلفني شي كلها 6$ ... 

هذا موقعهم الرسمي 

ecotools 

وهنا كذا رابط تقدروا تشتروها منو 

drugstore

iherb

amazon 

ووووووووووووووووووبس ^_^ 

لا تنسوا تتابعوني على تويتر وانستغرام 

@zekraalsolami 

وطبعا سناب شات 

zekraalsolami1

Love

XOXO