تجربتي لكورس الزيركتان وروتيني في عنايتي ببشرتي

السلام عليكم "

كيفكم بنات ؟؟

تدوينة اليوم كثير طلبوها مني عشان يعرفوا كيف صرت أتعامل مع بشرتي بعد كورس الزيركتان ..

*******************

أول شي حتكلم بشكل مختصر عن كورس الزيركتان اللي أخدته وسببه :

أنا طول عمري ماقد طلعلي حبوب ببشرتي خصوصا الحبوب اللي تجي مليانة سائل ابيض ومدري ايش 

كانت طبيعية بين فرتة وفترة تطلع لي حبة ولا حبيتن مو قضية كبيرة 

لكن قبل 9 شهور أو أكثر وفجأة بدون مقدمات وجهي أمتلى حبوب .. ومو أي حبوب لااا 

وجهي كان متورم بمعنى الكلمة كأني مضروسة 

والحبوب كانت تطلعلي 3 حبات بنفس المكان ومليانة سائل أبيض وصديد 

وكانت منتشرة بكل وجهي خصوصا خدودي وجبهتي 

طبعا غير عن أنو بشرتي أنعدمت وغير عن أنو شكلها كان مقزز .. كانت مؤؤؤؤؤؤؤؤؤؤؤلمة 

بجد كانت مؤلمة وتنزف لوحدها بدون ماألمسها حتى .. كنت أصحى من النوم آلاقي المخدة كلها دم وصديد :"( 

ماحكمل لأنو بجد يصعب شرح الموضوع <<< الله لا يعيدها أيام 

المهم أنو نفسيتي أتدمرت وكنت أمشي وأبكي طول الوقت 

ورحت المستشفى وأول ماشافني الدكتور قالي شوفي يابنتي أنا ماأوعدك أنو علاجي حينفعك لأنو اللي فيكي شي غريب 

سويت تحاليل لكل شي حتى الاكزيما وللأسف ماعرف الدكتور سببها ..

قالي داومي على موية زمزم وأقري على نفسك وبعدها استخدمي الدواء ..

أول شي سوالي تحاليل خاصة بالكورس تكشف عن نسبة الدهون في الدم وعالكبد وأشياء زي كذا .. 

وقالي بناء على النتيجة نقرر إذا نبدأ الكورس أو نصرف النظر عنه 

جيته بعد يومين و الحمدلله نسبة الدهون عندي معتدلة وبدأنا الكورس 

قالي أستمري الدواء حبتين كل يوم ولا تخافي لو زادت الحبوب لأنو الدواء قاعد ينظف البشرة من الداخل ..

وقالي تعاليني بعد اسبوعين نشوف النتيجة 

طبعا محسوبتكم شدت حيلها وبدأت بالدواء ولاحظت كل يوم الحبوب تزيد قلت عادي هو قال لا تخافين 

ومن زود الدفرنة اللي فيني مارحت له بعد اسبوعين قلت اشد حيلي واكمل شهر وبعدين اروحله 

ورحت له بعد شهر وحالي أردى مية مره .. وجهي كله جروح 

اول ماشافني قال أيش هببتي بنفسك ؟؟ 

قلتله أنتا قلتلي عادي لو زادت شويا 

المهم سوالي التحليل من جديد وقالي أنو جسمي كان بيرفض الدواء طول الفترة اللي فاتت 

وأنا بعاند وأخد الحبوب وكانت ردة الفعل سيئة ..

جاء بيعاتبني بس شافني خلاص على وشك أصيح قام قالي أنتي شطورة أنك شديتي حيلك وأستمريتي عالدواء بس ضروري تجيني كل اسبوعين نسوي التحليل لأنه الدواء ممكن يرفع الكوليسترول ويسبب انسداد شرايين ..

المهم أعطاني دواء ثاني يساعد الجسم أنو يتقبل الزيركتان وأعطاني مضادات حيوية عشان تخفف الالتهاب اللي صار بوجهي بسبب الحبوب .. 

وكملت عليها زي ماطلب مني وكل اسبوعين أجي مره اسوي التحاليل وكان ينبه عليا اخفف فاست فود وأقلل دهون .. 

وبعد 3 شهور ياربي لك الحمد أختفت الحبوب تماما ومابقي إلا الآثار .. 

ووقفت الدواء بس طبعا مو فجأة .. لا قللت الجرعة وصرت يوم بعد يوم لين وقفته تماما ..

بعد كذا قالي نبدأ بكورس تاني عشان نشيل الآثار تقشير ومدري أيش ..

بس عاد محسوبتكم عاشت رعب وخفت لا أستخدم شي ويرجعها قلت له لا مايحتاج أنا راضية بوجهي دحين .. قعد يضحك عليا وقالي براحتك .. أرتاحي فترة وعدلي نفسيتك وبعدها نشوف .. 

المهم أني عشت فترة الله وحده يعلم بحالي فيها .. كنت أصحى من النوم زي المجنونة وأجري عالمراية أشوف إذا رجعت الحبوب ولا لا .. كنت لو نقطة حمراء تبان بوجهي أقلبها مناحة وأقول خلاص رجعت من جديد .. 

دحين ليا أكثر من 4 شهور والحبوب مارجعت وبشرتي كل مالها تتحسن وترجع لوضعها الطبيعي ... 

طبعا متأكدة كثير منكم بيسأل مين هالدكتور ^_^ 

أسمه د. حلمي الجيار أخصائي أمراض جلدية وتناسلية 

كان في مجمع خالد الطبي في حي السامر 

وبعدها جاه عرض وطلبوه مستشفى عبد اللطيف جميل 

ربي يجازيه ألف خير ما نساني عطاني كرته وقالي تعالي تابعي معايا في مستشفى عبد اللطيف جميل ضروري هو بنفسه يكمل معايا الكورس 

والله يابنات بجد كل ما أفتكرته أدعيله من قلبي 

بدور لكم كرته واذا لقيته بنزله في الانستغرام ^_*

**********************

المهم نبدأ بروتين عنايتي ببشرتي ^_^

أول شي نصحني الدكتور أستخدم منتجات بايوديرما .. عشان كذا رحت وقشيت منهم كل شي 
( غسول - مرطب - مقشر - مزيل مكياج ) 

بالنسبة للغسول أستخدم هذا الجميل 

مخصص للبشرة الدهنية والمختلطة بس حاليا أنا بشرتي جافة والتي زون تدهن شووويا 

ومع كذا ماشي معايا تمام 

ينظف من قلب بس ماينشف أبد 

الصبح أستخدمه لوحده واغسل وجهي بدون فرك قوي .. بحركة دائرية خفيفة ..

وبالمساء استخدمه بإسفنجة أيكو تولز 

هالاسفنحة مريحتني بشكل .. خصوصا إذا حاطة مكياج تنظف المكياج تماما بدون ماتكون قاسية وخسنة على بشرتك ..

وبالاسبوعين مره أستخدم فرشة سيغما لتنظيف البشرة لأنها قوية شويتين على بشرتي .. بس زي ماقلت لكم كل اسبوعين أغسل بيها فيعتبر تنظيف عميق ..

بالنسبة لمزيل المكياج أذا كنت حاطو شي ثقيل ووتر بروف استخدم مزيل بينفت ذير ريل 

ينظظظظف من قلب ويشيل كل آثر للماسكرا والايلانير 

أما بالايام العادية بعد ماأخلص غسيل وجهي بالاسفنجة أمسحه بخفة بمزيل مكياج بايوديرما واخليه ينشف 

مأأشطفه بعدها لأنه يعتبر زي التونر ..

بالنسبة للتقشير فهو ضروري كل فترة وفترة عشان يشيل طبقة الجلد الميتة 

أنا أستخدم هالمقشر كمان من بايوديرما مرة بالاسبوع وادلكه بخفة بجركة دائرية .. الحبيبات صغيرة بس تحسي أنها تنظف ..

نجي للترطيب أهم خطوة 

ضروري الوحدة ترتطب بشرتها حتى لو دهنية 

المهم أنا استخدم مرطب بيديرما الكريم <<< أيام الكورسن كنت أستخدم نفس هذا بس لوشن يجي أثقل ويدهن شويا 

بس لأنو الزيركتان يسبب جفاف قوي للبشرة كنت أحتاج مرطب ثقيل مره عشان ما تتجرح الحبوب ..

المهم أني استخدمه مرتين باليوم ( الصبح وبالليل ) 

وأحيانا بالليل أخلط معاه شويا من زيت الجوجوبا يرطب أكثر ويعطي نظارة للبشرة 

طبعا زي ماقلت لكم بقي آثار من الحبوب 

وماحبيت أستخدم أشياء كيميائية وترجع المصيبة القديمة ..

عشان كذا صرت أستخدم هالمكس الجميل ( سائل الجلسرين <<< سائل مو زيت ركزوا ) و ( زيت اللوز المر ) 

استخدمهم $ مرات بالاسبوع تقريبا على كل وجهي 

وأحلف لكم يابنات خفف لي الاثار اللي كانت بني غامق بنسبة 60% وأكثر 

صارت دحين لونها بني فاتح وقربت تختفي 

بس حطي نقطتين من كل واحد ووزعيها على وجهك وأعملي مساج بأطراف أصابعك لمدة 10 دقايق قبل ماتنامين 

عشان تتشربة البشرة ويعطي مفعول 

هذا طبعا غير أنو يرطب البشرة وينعمها ..

كمان من الاشياء اللي فادتني 

وأصلا هي ضرورية لكل بنت ( موية الورد ) 

أنا حاطته بالثلاجة وطبعا تعرفوننا أحنا شعب نتجه للثلاجة بأي وقت حتى لو مانبي ناكل شي لازم نطل عليها ونتطمن ههههههههههه

المهم صرت كل مافتحت الثلاجة أشوف العلبة بوجهي وابخ بختين على وجهي 

البرودة لحالها منعشة .. 

أخيرا رح أتكلم عن الاقنعة والدلع 

أنا حاليا أميل أكثر للأقنعة الطبيعية زي : 

( موية ورد ونشا وليمون ) 

( عسل وشوفان وموية ورد )

( حليب بودرة وزبادي )

بس ما يمنع أني كل فترة أدلع نفسي بأقنعة جاهزة 

اللي تحت في العلبة قناع طين <<< سارقته من ماما

حبيته لأنه يعطي أنتعاش للبشرة كأنك حاطة نعناع على وجهك << تعرفون لسعة النعناع .. هذي هي ..

جربته مرتين إلى الآن ماشفت نتيجة قوية بس يعتبر جيد 

أما بالنسبة للأقنعة الجاهزة أحب ذا فيس شوب وبيزلين 

صح مفعولهم مو قوي ودائم بس حلو تستخدمينهم قبل المناسبات وكذا ..

آخر شي قناع الرؤوس السوداء 

أنا الحمدلله ماعندي رؤوس سوداء بس للإحتياط أستخدمها مره كل شهر أو شهرين .. 

ووووووووووووووووووووووووووبس 

^_^ 

إن شاء الله أستفدتوا من البوست 

لو استفدتوا لا تنسوا تشاركوه مع حبايبكم ^_^ 

وطبعا لا تنسوا تتابعوني على تويتر وانستغرام وستورهاوس

@zekraalsolami 

Love

XOXO